Nihin Malaysia Hmunkip Ah Tlaihkhihnak An Tuah

Nihin Malaysia hmunkip ah tlaihkhihnak an tuah.

Nihin August 23, 2019 ni ah Malaysia hmunkip ah Malaysia cozah nawlngeitu hna nih tlaihkhihnak an tuah tiah ACR community sin in theih a si.

Nihin August 23, 2019 ni zong ah Chinmi tampi kan umnak Pudu bazar ah operasi an lut ti zong theih a si i Chinmi an tlaih mi hna an um le um lo tu cu theih a si lo tiin FRO community sin in kan theih than.

Zahan August 22, 2019 zan zong ah khan Chinmi tampi kan umnak Pudu, Semping, Kepong le Imbi ah tlaihkhihnak an tuah ruangah Laimi zong an tlaihmi hna an um pah tiah theih a si.

Nihin August 23 nih Kuala Lumpur le hmundang pawl ah tlaihkhihnak fak pi an tuah tiah theih a si. Cu ruangah rian a tuanmi Chinmi hna nan umkalnak ah ralring tein rak umkal cio hram hna uh.

A herh tuk lem lo ahcun lenvah lo zong i zuam hna usih. UN Card a ngei lomi caah ralrin a herh khun. Operasi nih tlaih cangmi cu i tlanh awk zong a har tuk fawn cang. Cu ruang UN card a ngei lomi caah ralrin taktak a herh.

UN Card a ngei komi caah cun thinphang tuk awk a um lem lo. Tlaihkhihnak ton sual zong ah thlah colh a si. An in thlah colh lo i lockup ah an in kalpi a si ahcun UN nih an rak in chuah te ko lai. Zan khat ah chuah colh mi zong an um, zarh khat ah chuah mi zong an um i ni 14 ah chuah mi zong an um.

Tlaihkhih kan ton lonak ding ahcun ralring tein um a tha bik. A herh tuk lem lo ah lenvah lo ding. A bik in KL hi tulio ahcun ralrin a herhmi a si.

Na hawi le nih an hmuhnak lai rak share ve. 

 

Leave a Reply

Your email address will not be published. Required fields are marked *