Hakha Ah CNLD Nih Mipi He Tonbiaruahnak An Tuah

CNLD nih Hakha zung on nak le mipi he tonnak an tuah.

Chin ramkulh Hakha khuapi ah Chin miphun party a simi CLND nih catarnak an zung on nak an tuah.

Kum 2020 Kawlram thimnak ah Chin ramkulh chung ah teinak a hmu lai tiah mipi nih ruah cio mi CLND cozah an cawlcangh ning a tha ngai. Thlanglei tlang hna zong ah mipi he tonnak le an signboard tarnak hi khuapi kip ah an tuah cang.

Chin ramkulh myone kip an tlawm lio a si. Chin ram caah Chin miphun party theng te hi Chinmi nih kan herh bikmi a si.

Kum 2020 thimnak ahhin Chin ramkulh chung ah Suu Kyi party a simi NLD nihhin tlawmpal te lawng mee an hmuh men te lai tiah ruah cio a si cang. A ruang cu NLD cozah nih kum 5 deng an kan hruainak ahhin zumh lonak thil tampi a chuak i mi thinlung faknak zong tamtuk a chuak. Ralkap chan lio bantuk in “upadi upadi” ti rumro an i tlaih caah hin kum 2020 thimnak cu an tla lai tiah an ruah cio. NLD chung in kum 2020 thimnak ah MP a tling dingmi cu tlawm te lawng an si lai tiah an zumh.

Kum 2015 Kawlram thimnak lio ah khan NLD ah biatak tein thazang a rak chuah i vote a pemi minung tamtuk nih NLD an chuahtak cang. Kum 2020 thimnak ahcun Chin party vote kan pek lai an ti dih cang.

Chinmi chung in kan mifim thiam sang hna le kan upadi thiam sang hna nihhin Chin ramkulh NLD cozah cu upadi an i tlaih tuk lehpek an ti cio hna. Cun, eihmuarnak tete kong ah lunghrinhnak a tamtuk. Kawlram chungah Chin ramkulh eihmur a tambik ti a si.

NLD cozah nih a tu kum 5 a cozah a tlaih chung ahhin tuan khawh ding a simi thil a fel lo ruangah a tuan khawh lomi tampi a um. A tuan ko nain a dik lomi tpi a um. Hakha Market kha tangka tam taktak dih in an sakmi kha zei ruangah an theh than? Ruah awk tamtuk a um. Matupi sizung tangka tam taktak in an sak i a kak colh. Hakha khuapi caah Timit dinti tangka tam taktak in an tuah i an tuan chuah kho lo. Mah vialte hi felfai lo ruangah a si dih.

A tulio kan buai cuahmah mi Hakha khuathar inn hmun samh mi hna hi cozah nih budget a ngeih lo ahcun mah bantuk project rian hna hi i thawk phung a si lo. Inn hmun zuar chommi in hei sersiam ding sawhsawh khi cu ngakchia thil tuah a si.

Kum 2020 thimnak ahcun Tedim peng ah ZCD nih teinak a hmuh lai. Matupi peng ah CNLF nih teinak a hmuh lai. Thantlang peng ah CNLD nih teinak a hmuh rih lai. Falam ah CLND nih teinak a hmuh lai. Salai Lian Luai nih Bualpi khua a rak hrawh dih mi hrim kha nihin tiang Falam peng an lung a fak peng.

Mindat le Paletwa peng lei tu hi theih lo bak an si rih. Hakha peng tu ahcun NLD nih teinak a hmuh khawh men.

 

Leave a Reply

Your email address will not be published. Required fields are marked *