Rohinya Ralzam An Kir Duh Hoi Loh

Rohinya ralzam nih tlun an duh lo

Rakhine ramkulh in Bangladesh lei ah a zammi Rohinya ralzam hna cu nihin ah Rakhine ramkulh kir ding in a voithumnak timhtuahnak an ngei nain an hlawh a tling kho lo.

Bangladesh Rohinya ralzam camp Cox’s Bazar ah Bus 5 le truck 10 bak nih nihin August 22, 2019 ni ah zing sml 9:00 in an hngah hna i a ho hmanh an chuak lo.  Rohinya ralzam pawl nihhin a ho hmanh nih Kawlram kir hi an duh lo.

Kawlram cozah nih an timhtuah ning ahcun Rohinya ralzam minung 3450 nihin ah an rak tlung lai tiah an ti. UNHCR le Bangladesh cozah nih ralzam minung 300 hrawng an ton hna i bia an hal hna. Cu tikah Rohinya ralzam nihhin a ho hmanh nih Kawlram ah kir hi an duh lo tiah Bangladesh UNHCR lutlai Mohammad Abul Kalam nih a chim.

Bangladesh ram Rohinya ralzam hna hi a luanciami kum 2018 November thla ah khan Kawlram cozah nih kir ding a rak ti bal cang hna. Myanmar immigration le palik zong nih ramri ah an rak don cang hna. Rohinya ralzam camp ah Bus zong an phan cang. Sinain cu lio ahcun Rohinya ralzam pawl nih Kawlram ah kan kir kho lo tiah sandah an rak piak.

Cuticun Kawlram cozah cu hlawhtling loin an rak um. Myanmar cozah le Bangladesh cozah hi Rohinya ralzam kirnak dingah voi tampi tonnak an ngei cang nain a kir duh bal lo.

Myanmar ram ah kan kir ahcun kan thi lai, humhimnak a um rih lo tiah an ti. Myanmar nih citizen kan pek bak hna lai timi a um lo ahcun kan kir kho lo tiah an ti pengmi a si.

Nihin August 22 ah Myanmar timhtuahnak in Rohinya ralzam kir dingmi an kir duhlonak kong ah Kawlram cozah nih zeihmanh chimphuannak a ngei rih lo. RFA

 

Leave a Reply

Your email address will not be published. Required fields are marked *