Thinlung Cu A Nuam Kho Hrimhrim Lo Nain Thil Cu Kap Hnih In Zoh Thiam A Herh Ve

THINLUNG CU A NUAM KHO HRIMHRIM LO NAIN THIL CU KAP HNIH IN ZOH THIAM A HERH VE

Nizan Hakha ah acang mi thil cu rian tampi lak ah keizong a hmun ah kal in ka va zoh ve. Thinlung cu a nuam hrimhrim loh. Cheu khat nih Cozah an sawichiat lio ah cheu khat ve nih Ram ngei pawl an sawichiat ve hna. Cu chung in ka hmuh ning tlawmpal tein von tial ve ka duh.

Hakha hi kan Chin ram khualipi a si bantukin atung avang kan kauh hrimhrim cu a herh. Arauh hlan ah minung singkhat tel cu si kho usih tihi kan Pale hna duh bikmi a si. Nihin Chin cozah nih Hakha khuatungvang kauh a timhmi zong hi a tlangpi in Chin mipi nih kan lung a tlin dihmi asi ko. Cucaah cun Inn hmun zong samh ding a si ko i aherh ahcun phung ning lo vawlei humhaktu pawl zong cu chuh phung asi ve tthiamtthiam ko.

Asinain tutan kan Cozah an khuakhan mi chung ah duh a nung lo tukmi pakhat cu, inn hmun samhmi chung in hmun ttha ttha vialte mi rum kut ah zuar dih cicek an timh mi hi asi. Ekah 676 a samh mi chung ahhin inn hmun 700 hrawng lawng mipi sin ah phawtzamh a timh cang. Inn hmun hal/sawktu hna hi Dawng 1900 leng an si fawn. Mi sifak pawl inn hmun caah Ting 40/50 a chuah kho ve lomi, aa cawk kho ve lomi pawl caah cun ruahchan ding a tlawm tuk. Inn nei lo caah kan samh an ti nain inn hmun 4/5 nei cia mirum pawl caah hmun samh mi a lo te hawi ko lai hih.

Cozah pakhat nih Myoh Planing caah zeitluk dah timhtuahnak a ngeih mu. Budget a neih lo ahcun rak samh lo lawlaw ding khi a si deuh. Aa tinh mi a hram cu a ttha tuk mi a lo nain a donghnak resultvan ruah ahcun lung cu a fak ngai ko. Hi thil pakhat te hi an i palhnak bik cu asi tiin ka hmuh.

Cun, kap khat leiin tutan inn ttheh piakmi kong he pehtlai in van chim rih ka duh. Media nih Dawng 133 nih inn an sak tiah an thanh. A taktak ah cun, Minung umnak caah sakmi hi inn 30 lawng a si. A tangmi 103 hi inn si loin Thlam an si. Phung ning loin sakmi_minung umnak a tlak lomi_minung zong an um lonak a si. Cucu biapi in Cozah hrawhmi cu an si. Hihi Hakha hrinnu sorpa zong nih theih pi lo mi Pupa ram zong a rak si bel lomi, zei dum le hau hmanh zong an rak tuah bel lonak ramking a si. Nihin ah nan mit in nan hmuh dih ko cang khah! Diknak tehe Loram neitu inn 6 hrawng cu an luat ve ko kha awh.

Hakha hrinsor le Cozah hmanh nih theihpi lomi “Pupa ram ee_cu ee, kha ee” tiah Hakkauh tuk le Eihmuar in Cozah nih hmun samh a timh, Lam a cawh le cangka in duhnak ka hmun cio poh vaa thim i inn fate va sak, dum hna vaa tuahter thulh tibantuk pawl hi cu dirpi awk an ttha ve hrim loh.

Tutan NLD Cozah thil tuahmi hi a hman bak mi a si ko. Upadi ning zong a si. Diknak in Hakha sersiam tthan khawhak lam a um chun a si fawn. Thil sining fiangte in a hngaltu pohpoh nihcun hi kong ahhin cun Cozah hi dirpi ko hna usih_holh tam tuk lem loin…Mipi zong nih vawlei cungah Cozah Power neihnak a san zia zong hi i fiang pah ve cang hna sehlaw hmailei tu ah zeithil kan tuah tik pohpoh ah dinfelnak le diknak ah lam kan hruai cang ko seh.

Kan Chin ram ahhin sersiam ding mi thil tampi an um rih. A ral ttha mi Cozah, dik lonak le Eihmuar a doh ngam mi Lutlai kan herh tuk lio asi. Tutan ahhin Cozah nih a duh ning bantukin hlawhtlinnak a hmuh ahcun a tangrih mi thil dang kongah hin a tluang thai cang lai. Dirpi an hau. Cu lo ahcun kan Chinram pi hi remh awk a ttha ti lai loh.

Min langhter a duh lomi pakhat 

 

0 Replies to “Thinlung Cu A Nuam Kho Hrimhrim Lo Nain Thil Cu Kap Hnih In Zoh Thiam A Herh Ve”