Mandalay – Muse Motor Lampi Ah Motor Mongtu Zultu Pawl An Sining

Mandalay – Muse lampi cungah ai tapmi Motor zultu pawl an nunning le sining kong tlawmpal hin ka hun langhter duh.

Mahhi hmun ahhin Laimi zong a kalmi tampi an um cang. China lei an kalpah ah Yangon – Muse, Mandalay – Muse lam in kal tawn a si.

Mahhi Lampi hi Myanmar – China kar pehtlaihnak lam 80% tluk a si. Nikhat ah US dollar 15 million tluk thil a lut-chuak tiah Myanmar thil kuat-kirnak zung in an chimnak in theih a si.

Kawlram hi China thil a hmang taktak mia  si caah Kawlram cozah nunak lampi pakhat a si ti usih law kan palh lai lo dah. Cu tluk cun a biapi lam a si.

August 15, 2019 zing sml 5:00 khuadei lai te ah AA, MNDAA le TNLA  hriamtlai hna nih Naung Cho gate in an kah i Gun Twin hlei an hrawh. August 16, 2019 zing ah Chinshwe Motor kam ah hlei pahnih hriamtlai nih an hrawh hoi. Kawlram nunnak hrampi a simi hlei pathum hriamtlai nih an hrawh tinak a si.

An hrawh ning hmanh a fak ngai. Gun Twin hlei cu ni 5 chung ah cozah nih kan remh dih kai an ti i August 20 cun an on cang lai. Chun he zan he ralkap nih hlei cu an remh. China ramri Chinshwehawng hlei zong an remh cuahmah hna.

Motor mong le zultu pawl lampi ah ai tapmi khuami nih rawl le ti an pek lio hna

Mahhi hlei pathum an hrawh ruangah Motor tamtuk an i tap. Mandalay – Muse kar ahhin nifantin thilphur Motor 300 nak tam lo a kal peng. Chun he zan he an kal. Yangon – Muse karah nifatin khualtlawng phurtu Bus 300 reng lo a kal peng fawn. Zeidang Motor fami tete he hin cun Motor tamtuk a kalnak lam a si.

Cu lam cu hriamtlai nih hlei an hrawh caah le raltuknak a um ruangah lam an block i Motor mongtu le Motor zultu minung tamtuk lampi ah an tang hna. An Motor a tannak hmun in khua dang ah va kal awk le vai chawh awk an tha lo. Raltuk nak a um cuahmah lio a si caah an i tapnak hmun cio ah um a si. Khua pawng a naih deuh mi caah cun a poi tuk hnga lo.

Thil phurhnak Motor liam pipi an si tikah a montu le a zultu pahnih pathum cio an um um. Motor fami le khualtlawng a phurtu Motor he cun minung thong tampi lampi ah an i tap tinak a si.

Cu hna pawl caah ko hin tih a nung mi le a harmi a si. Rawltam tihal in an um. An phurhmi rawl kha ei a hau cang. Facang a phurtu Motor rawl kha an ei a hau. Cuticun lampi bak ah an riak hna.

Tu zing hna kha cu khuami nih Naungpin le Cohmee khuami hna nih lampi ah ai tapmi Motor zultu pawl cu thaithawh he zanriah ca he ei ding an va pek hna. An thil phurhmi kaltak awk a tha fawn lo. Cuticun lam leklawk ah an um ko hna.

A tlung lei le a kir lei Motor tamtuk an i tap tikah minung tamtuk harnak an tuar hna. Zeitik ah lam a awn lai i kan kal than lai ti lawng an ruat. Nihin ah Loshio myone Kuatkan myone hrawng ahcun phone line a pit ti a si. Mytel le Ooredoo lawng line a um ti a si hoi tikah pehtlaihnak a har ngaingai ti ah an chim.

Cozah nih ralkap thazang an chap chin lengmang fawn. Hriamtlai nih an kah chin lengmang ve hna. Raltuknak hi zualhma chin lengmang dawh a si cang. Motor mongtu le a zultu pawl caah a har bikmi a si.

 

 

Leave a Reply

Your email address will not be published. Required fields are marked *