Afghanistan Ram Thit-umnak Puai Ah Nunpek Bomb A Puak Minung 60 Leng An Thi

Afghsnistan khuapi thitumnak puai ah bomb a puak minung 60 leng an thi.

Afghanistan ram khuapi bik Kabul ah thit-umnak puai pakhat ah nunpek bomb a puak i minung 60 renglo an nunnak a liam tiah theih a si.

Mithmutu hna nih BBC sinah an chim ning ahcun nunpek bomb a puah tu nihhin thit-umnak puai an tuah lio pi bak ah bomb a puah hi a si tiah an chim. Nizan August 17, 2019 ( Afghanistam time in zan sml 10:40 ) ah khan thit-umnak puai ah nunpek bomb a puah hi a si.

Mahhi hmun hi Shia Muslim pawl hna tambik an umnak a si. A tu bomb puahnak ahhin Taliban hriamtlai nih kanmah kan si lo, kanmah he kan i pehtlai lo tiah an chim. A ho nih dah nunpek bomb a puah i zeibantuk phu he dah an i pehtlai timi theih a si rih lo.

A tu hi Afghanistan ram ahcun Taliban hriamtlai pawl hna le US nawlngeitu pawl hna cu Afhanistan ram ah US nih a ralkap a chiah mi hna tlawmter deuh ding in i ceihmainak ah a hnubik dirhmun an phak lio a si.

Thit-umnak puai i nunpek bomb puahnak ahhin a tlawmbik minung 63 an nunnak a liam i minung 182 hliam an tuar. Hliamtuar mi lak ahhin nu le ngakchia tampi an i tel tiah Aghanistan cozah nih an chim. A tu thit-umnak puai hi ropui ngai in an tuah mi a si caah minung thong leng in an i telnak hmun a si.

Afghanistan ahhin Shia Muslim le Sunni Muslim tiin an um. Shia muslim pawl hi Sunni Muslim le Taliban hriamtlai i bawm in an doh lengmang mi hna a si. Tutan nunpek bomb puahnak zong hi Shia Muslim tampi an si tikah Sunni muslim ralhrang an si lai tiah an zumh.

Thit-umnak puai ah nunpek bomb a puahnak hmun ahhin mithi ruak tammpi an ril ko hna. Thutdan le cabuai tampi an rawk. Sml pahnih chung cu mithi ruak le hliamhma tuar kan buaipi hna tiah a hmun ah a ummi Mohamad Pha Hat nih AFP sinah a chim.

 

0 Replies to “Afghanistan Ram Thit-umnak Puai Ah Nunpek Bomb A Puak Minung 60 Leng An Thi”