Lamkam Ah Chin Miphun Thuam Le Lam In Kawl Bawi Don – Pu No Than Kap

ZINPI KAP in HNAM LAM thawn KAWLVAI BAWI HMUAK

Kum 9 lai sungah kan ram politics siseh, sumdawnnak siseh, Cozah hnaṭuan le uktu dinhmun ah siseh, a selam le ṭhalam in thlengawknak hmuh theih in a um vivo.

Asinan cui lakah, hmailam kum kul sawmthum tiang lai daih thei ding “thleng harsa zet thil” pakhat cu ram mipi lungput hi a si.

Thleng ṭul lungput lole tuah ṭheu mi tampi lakah Chin pawlin kan thleng ṭul mi pakhat cu zinkap ihsin hnam thuam le lam thawn Kawlvai bawi hmuak hi a si.

Rampi uktu lubikpawl ton canah siseh, ramsung upa pawlin khuallian an neih can ah siseh, ram sung upa tonawk can ah siseh, hmun pakhat (innpi sung telin) ih to khawm can (zanriah kiltlang tvk.,) ah hnam lam thawn lamtu an um. Hihi tokhawmnak ti sunglawi tertu le khuallian upatnak langtertu a si.

Hivek canah loud speaker or sound box ring zet in phuan in hlasak le lam a um lo. Dai nem diahdo ten hnam hla le lam thawn sunlawihawk a si.

Hminsin dingah,
Hitin hnamlam thawn upatawk langter can a um nan, mikhual bawi upa hmuak laiah, lamzin kap le tualrawn tivek ah hnam lam thawn lam ciamco hi a um lo tluk a si.
~
Sunlawihawk ruangih hnam thuam le lam thawn Kawl bawi upa rak hmuak hi Chin miphun ih thlun tengteng ding dan pakhat tlukah kan ret tla a bang. Mai khua le Ram ih ra tlawng mikhual cu lungawi sopar ten hmuak a ṭha.

Hmanseh,
Bawi upa ra thlawng pawl khi khawnu khawpa le upa pawlin hni siamsiten kut rak kai in rak hmuak hai sehla a tawk ko lo maw?

Cuhnakin uak deuh seh kan ti a si le fala tlangval mino telve in dingtlar in kut rak kai ko sehla ziangsi a palhnak um?

Kan fala le tlangval hnam thuam famkim hruhter ih lam thawn rak hmuak kherkher ruangah, bawi upa pawlin kan duh mi in pe ding tiin kan ruat maw?

Ziangbik tumtah in hnam thuam le lam thawn kan hmuak? Ka thei thiam thei lo. Hi thil hin ka hnak i doh.

2013 ah President in Chinram a tlawn laiah, Tedim khaw kiang Helicopter cawlhnak kiangah Chin thuam hruh in hnam lam thawn lam rero phahin an rak hmuak. An hmuah bik mi President cun lampawl cu mallai lawng a zoh ih a feh liamsan. Asinan a lampawl cu cawl cuang loin an lam rero. Ka zoh ih ka thin a nuam thei lo.

Aw! Hnamdang bawi upa hmuak in kan neihsun hnam thuamhnaw te thawn kan lam hnelhno rero lai a si hi maw! A thlengaw thei hrih lo mi kan lungput!

Rei hlanah President le a ho cu Falam an thleng. Vankau in Falam khawmi leng le val rual cun ceretlawh lam thawn an rak hmuak lala. President le a ho pawlin an lam lai cu dingin ṭhate hmanin zoh loin a fehsan lala. An lam hnelhno lai cu an mit sir te tal cun an hmu mahna!

A lampawl hin thabang zetin an rak zir rero ding si khawh, hnam thuam te thawn zoh nuam bik le mawi bik si dingin President hmaiah an lam taktak nan, an hmuah bik mi le a hopawl cun an mit sir in an zoh fangfang. An hmuah mi lakah telve in ka mit in ka hmuh mi a si ruangah ka thin a so, ka thin a na, tuar har ka ti.

A lampawl a zoh ih zoh paih lo bawi khal an um.

Curuangah,
Kan khua ih ra thleng ding bawi upa hmuak tikah, khawsung a lut can, asilole zinpi lole inn sak thar tvk., awng dingih a feh laiah hnam lam thawn lamzin sir tivekih rak lam rero hi cin vivo ci a si lo.

Kan sunlawih duh taktak a si le an cawlhnak innpi le tual rawn tivek ah an cawlh hnuah cawl hahdam phah ih zoh dingin lam sak sawn ding a si.

Khawsung le zohter kan duh mi hmun an ra thlen lai ahcun khaw sung upa le fala tlangval pawlin ding tlarin an kut kaiih parṭhi tivek rak awrh hi a tawk.

Chin pawlih kan thleng ding mi thil lakah “lamzin kap ih Chin thuam le hnam lam thawn Kawlvai bawi hmuak” hi a tel ve.

Pu No Than Kap 

0 Replies to “Lamkam Ah Chin Miphun Thuam Le Lam In Kawl Bawi Don – Pu No Than Kap”