Tu Hnu Chan Thum Ahcun US Laimi An Tlau Dih Te Lai

US ummi mino nih Laiholh hmang deuh usih. US, Indiana ah CYONA nih covention an tuah i kan lawmh pi ngaingai hna. Minung zong an tam ngai tiah kan theih. Mah tluk in Chin mino ai bu khomi le ai hruai khomi cu CYONA lawng hi an si rih.

Australia lei zong ah CYO an um ve nain CYONA tluk in an cawlcang kho lo. Laitlang zong ah CYO an um nain CYONA tluk in an cawlcang kho lo. Malaysia zong ah CYOM kan um ve nain CYONA tluk in kan cawl kho lo. An nih cu an pical taktak khi a si ko.

A mah belte Laiholh a thiam lomi an tamtuk mi tu khi lungrawk ngai a si. Civui an tuah lio hna live in ka zoh. Hawikom theihhngalh tete thawngpang ka hun hal hna tikah Laiholh a holh mi hi an tlawmte. Civui taktak program chung ahcun Laiholh a um pah nain a leng an tlawmlen hna le bang ahcun Laiholh a um tuk lo khi a si ko tiah an chim.

CYONA nih internship in Hakha ah an rak thlah mi Rose Bawi Tha Par kha Malaysia  a rak tlun pah ah interview ka rak tuah. Cu i a chimmi cu Sunday school ngakchia ahhin Laiholh a theithiam kho deuh lomi an um i khan dang ah mirang holh in kan chimh hna tiah a ti. Ruah ahhin thinlung a fak ngaingai. Ziah Laimi si ko tung, Laifa si ko tung i Laiholh theih huaha ti lo cu aw  a poi taktak khi a si ko cang.

Kan miphun kan tlai lonak ding ah a biapi cemmi kan ca le kan holh hi a si ko. Kan ca le kan holh a tlau ahcun mirang ah maw kan chuah lai, kawl ah maw kan chuah lai khi a si ko. Cu ruangah kan miphun himnak ding caah a biapi taktak mi cu kan ca kan holh hi kan thiam hrimhrim a herh mi a si.

US ah Laimi kan phaknak hmanh a sau rih lo. Kum 30 fai lawng a si rih. 1990 hrawng ah Kuam chan ah khan minung a thong tluk an rak phan. Cu hnu ah Laimi nih US biatak tein kan phak hi kum 2003 hnu hrawng deuh in a si. Zapi kan phak cu kum 20 fai lawng a si rih ti ko usih. Mah tluk chan cheu hmanh a kal hlan ah Laiholh kan thiam lomi, Laica kan thiam lomi hi cu khuaruahhar a si ko. Mirang holh kan uar tuk bia maw a si hnga. Siloah kan thluak a chiat tuk i Laica le Laiholh kan thiam khawh lo dah a si hnga tiah ruah awk a um ngaingai ko.

Laica hi Kawlram cozah nih cawn  phih hnu ah khan cun sianginn ah Laica kan rak cawng cio lo. Tangcheu le tangkhat ah tlawmpal te kan rak cawnmi lawng kha  a si ko. Nulepa zong nih an rak kan chim cio lo. Kanmah tein Laica kan rel i thiam duhnak kan ngeih i kan i zuam ruangah Laica hi thiam mi lawngte deuh an si ko hna.

Cu ve bantuk in US ah a thanglianmi mino hna zong nih Laica Laiholh hi thiam duhnak taktak na ngeih ahcun thiam khawh tuk a si. Na nulepa nih Laiholh an thiam ko ahcun nangmah zong Laiholh thiam khawh tuk na si. A holh lawng si loin a ca hrimhrim zong rel thiam le tial thiam kha i zuam ding a si.

Kan i ziah deuh ai pat tiin mirang holh rumro hman ding a si lo. Laimi lawngte kan si ko caah kan thiam awk hrimhrim a simi Laiholh tuin kan holh le kan chim deuh awk an si.

A tu ning tein US mino nih mirang holh nan tlaihchan i Laica / Laiholh zei pipa ah nan rel lo ahcun miphun tlau nan si colh te lai. A tu ah a nung rih mi kan nulepa mual an liam te lai i a tu i a thang liomi mino nih Laica / Laiholh nan thiam lo ahcun nan fa le chinchin khi cu chim awk a um ti lo. Nan fa le i an fa le chin chan ah khin cun “Chin” ka si ti lawng an theih lai. Mifim deuh nih Chin tuanbia lawng an theih te lai. Mifim lo deuh le bang nihcun ” Chin miphun ka si” ti hmanh an thei te lai lo. A tu ning te in nan kal i mirang holh nan uar tuk ko peng ahcun tuhnu chan thum ahcun a chim awk a um ti lo. Tlau hmanh ah hmuh awk tha loin tlau khi a si ko cang lai.

Kawlram Kankaw peng ah khin Chin miphun tampi an um ti a si. A si nain a tu ahcun Kawl nih a dolh dih cang hna i Chin miphun ka si ti hmanh ai thei lomi tamtuk an um cang khih. Mah bantuk khi US Laimi zong nan si ve te lai.

Cu ruangah Laica / Laiholh ka thiam lomi cu keimah santliah lo bia  si ti ko. A nu le na pa zong puh hna hlah. Phun dang chim ahcun mifim ka si lo caah a si ti kha nangmah tein i theih ko. Mah miphun holh hmanh thiam lo, mah miphun ca hmanh rel thiam lo,tial thiam lo kha cu ka ning a zak tuk ti kha thei law a tu in i zuam cang.

US ummi mino tampi nih an relnak lai rak share ve hram. 

 

0 Replies to “Tu Hnu Chan Thum Ahcun US Laimi An Tlau Dih Te Lai”