Hmun Kip Um Laimi Nih Theih A Herh Ngai Tiah Ka Ruahmi Thil Pawl By Rev. Dr Van Bawi Kam

Hmun Kip Um Laimi Nih Theih A Herh Ngai Tiah Ka Ruahmi Thil Pawl

  1. Stage cungah kai riangmang in hlasa lio mi pangpar tthi oih le lampi tibantuk khi ngol a herh cang. Zeicatiah mivial te nih phaisa dih in an rat hnawh mi asi cio bantuk in a satu zong nih mi vialte caah thiamnak dihlak in an sak lio le lam lio asi ve. Cu lioah pangpar tthi na va oih mi, lampi mi le hmanthlak pi ruangah a hla sak mi na vaivonh ter. A aw chuah le feeling na hrawh. Cu bantuk thiamthiam in hlasak ngai tu midang vialte thinlung na batter i an feeling na hrawh hna. Cucaah mah khakha thil tikhawh zong asi lo pin ah miphun ngan nih tuchan ah an tuahmi zong asi fawn loh. Stage cung kai loin mipi sin ah um ve kha thil ti khawh le fim asi deuh i pawngkam minung upat zong asi fawn.
  2. Khrihfa Bu chungah buai le sik-el nak hi kan mak a cu cang. Zeicatiah hlan lio ahcun zudawr (bungsan) hi mikel lo i siknak le vuaknak hmun a rak sitawn. Asinain a tu ahcun Zudawr ah cutluk in sik le vuak a um ti lo nain Khrihfa Bu hi Zudawr bantuk in siknak le vuaknak ah kan hman cang. A bik in ram thumnak ummi kan si. Khrihfa Bu cu Khrih zumtu umnak hmun asi bantuk in Khrih Thlarau he i hawi komhnak hmun asi caah remdeihnak hmun asi awk asi.
  3. Kan mahnak in a fim le thilthei deuh mi cawnpiak kan hman mi hi ngol aherh taktak. Cucu mah hngalhlo phunkhat asi pin ah Khrihfa bu buaiter tu zong asi fawn.
  4. Theih mi ngei lemlo nain a theituk um in um hi a poi tuk.. Cucu mah le mah mual iphoh le ningzahnak phurtu asi caah kan ngol a herh tuk.
  5. Mahnak upa le hruaitu upat ttihzahlo le zeirel loin kan ummi hi hngol hrimhrim a herh cang. Zeicatiah mahnak upa upat ttihzah cu Bible lawng hmanh si loin biaknak dang zum lotu vialte hmanh nih an i cawnpiak mi asi caah kan nih zumtu chinchin nih cun kan tuah hrimhrim awk asi. Hruaitu nawl ngeih le upat zong hi Bible cawnpiak mi asi.
  6. Hnahchuak nak kan neih mi hi kan hngol awk hrimhrim asi cang. Mah hihi Chin phun mi a kan tthenter tu zong asi. Hnahchuah cu nangmah caah ningzahnak, chaitnak le sifahnak an phurtlunh tuding asi caah na ngol hrimhrim ah tha.
  7. Singer si ko nain hlasak lai ah biatawi chim ta lengmang hi ai dawh lem lo. Zeicatiah zeituah dingin sawm na si kha i fian aherh. Nang cu hlasa tu ding na si i biachim tu ding cu mi dang sawm an si kha philh hlah. Miphun pical sining zohchunh zong hi a herh ngai tawn. Thiangthlarau nih an fial mi asi tu ahcun phun dang.
  8. Community chungah siseh Khrihfa Bu chungah siseh pengtlang hoih le neih niam hoih in ttan le cawlcangh nak hi ngol a herh cang. Zeicatiah mah cucu ruahnak hmet tuk bia asi. Pengtlang nei lo le neih niam nei lo mi aho hmanh an um lo bantuk in nangmah bantuk in an tuah cio ahcun zeitin dah remnak cu a um khawh lai. Remnak timi cu midang kha mah bantuk in va ruah le hmuh cio nak lawngin a um kho mi asi.

Ref: Van Bawi Kam Zaitu

Leave a Reply

Your email address will not be published. Required fields are marked *