Hakha Hi Khualipi Sinak In Thial A Hau Te Men Lai By Salai KB Thawng

Hi kong he pehtlai in Parthlam nih a rak tial bal cang. Kei ka tial duh mi cu phundangte a si ve. Hi cabia ka tial tik ah a ka huatu ding nan tam ngaingai lai. Nan ka soisel ding le ka cung ah nan thinhun ding zong ka hngalhcia ko nain, aa suum kho phun ka si ve lo, ka hun tial duahmah ko hih!

Biahalnak in thawk hmasa ka duh. Hakha khualipi sinak in thial a hau te lai maw? Aho ruang ah dah thial a hauh te lai? Cozah ruang ah maw, mizapi kanmah ruang ah dah ti hi biahal cio kan duh hna. Keimah nih aphi kaa chuah ve ning ahcun, Cozah zong nih ningcang in rian an tuan dih kho lo i mizapi zong kan mawh ve thiamthiam. Kan pahnih in kan palh ko, tiah ka ruah.

Chin Ramkulh Hluttaw Chairman nih a chim lengmang mi cu, “Hakha cu Chin Ramkulh khualipi a si. Ramkulh le Ramthen hna lak ah sifak bik kan si. Kan thancho khawh nakding cu Hakha ah hin minung sing khat tal kan um a hau. Cucaah, vawlei le hmun kauh kan timh peng mi hi a si,” tiah a chim lengmang.

Cozah thar a kai hnu ah rian kau ngaingai in an i hmaithlak. Mizoram, Malaysia le ram dangdang in Chinram kir a duh mi ca ah vawlei le hmun pek ding, an hun ti lecangka vawlei man le inn hlan man van a tawng. Ziah cu hlan vialte kan pupa ram hi zeipipa ah kan ruah theng tung lo. Ralzaam dirhmun in mipeem sathlai pawl kirter ding le hmun pek ding ti lecangka i ka pupa vawlei e, cu e kha e, tiah a hlirh in kan i hlirh hnga. Cucu maw, Laimi cu thlachiat ruat mi kan si e, kan ti ngam rih. Kan hmurka cun, ram le hmun hi kan sianlo a si lo, tiah kan chim lengmang nain vawlei man a kai tik ah sipuazi mit lawngte kan au. A fawinak in chim ahcun kan siang taktak lo ti khi a si ko.

Kapkhatlei ah Cozah a palh ve. Ziah, ka vawlei a si, ka pupa ram a si, an ti ko mi kha vawlei cu Cozah vawlei a si ti riangmang in duhpoh in tawnhnawl ve zong cu upadi he aa tlak hnga maw? Ziah, vawlei ngei pawl an duhning hal hmasa awk a si lo maw? Khah, Hakha cu Chin Ramkulh khualipi dafawh a si. Inn kan karh i milu kan karh a herh hih! Nan vawlei hi kan hman a hau.

Tahchunhnak ah, acre 5 a ngei mi nih zatceo cu nan kan pek i kan hman a hau. Khualipi a thancho nakding le sifak santlailo, inn hlang le inn ngei lo zong inn le hmun ngei ve hna seh! Kan ram thatlo ruang le a him lo ruang ah hmun dangdang ah a tlizaam mi hna kir a duh mi zong kir ve hna ngat seh! Hakha hi atu nakin kan sersiam lai i Myanmar ram Ramthen le Ramkulh hna lak ah sifak bik zong si ti hlah usih! Nan vawlei hi miphun zawnruahnak he hmang ko usih, tiah Chin Ramkulh Cozah nih a si khawh chung in pupa vawlei ngei pawl kha a hrihhawh hna i, an lungtlin ding in a rak zuam hmasa awk a si. Nihin tu ah cun sual khat nih sual zakuai an ti bang, vawleipi kan hninh cang.

Atu kan dirhmun ning hin cun hmun dangdang in kir a duh mi le Hakha khua ah khuasak a duh mi zong kan ning a zak ngai men lai. Vawlei ngei pawl nih kan in sianh ko hna, ti hmanh hna sehlaw umhmun khuar le khuasak a har ngai kho mi thil a si cang. Ningzak kan si cang. Cucu, aho ruang ah ti a fiang kho ti lo. Cozah maw nan si, ram ngei pawl dik nan si cu mahle ruahning cio in puh nan si ko lai.

Cozah nih ningcang tein nan tawlrel lo ruang maw a si, ram ngei pawl nih nan sian ikpak lo ruang maw a si, kan hngal kho ti lo. Kum 4 chung a buai cang i aphi a chuak kho rih lo. Aphi a chuak kho ti lai ka zum lo. A buai peng ko rua lai hih! Hakha ah innlo karh le milu karh kan duh mi, ram le miphun sersiam kan saduhthah cio mi zong thei a tlai kho taktak ti bal lai lo. Kum zeizat tiang dik a buai rih hnga mu.

A donghnak biane ah, innlo le minung kan karh khawh ti vekvek lo ah, pupa ram le vawlei kong ah a buai bal lo mi Chin Ramkulh khuapi dangdang ah Hakha Khualipi hi khualipi sinak in thial ding a si cang ko lo hme maw? ###

Salai KB Thawng ( The Hakha Post )

Related posts

Leave a Comment